Warê rondika

Navê kitêbê: Warê rondika

Nivîskar: Mihemed Selîm Siwarî

Weşanxane: Multeqa El-ehalî El-seqafî El-îraqî

Sala weşanê: 2010

Hejmara rûpelan: 446

 

Ev roman me dibe nav dem û cihên cuda li başûrê Kurdistanê, li Bexda, li Urdun û Emerîkayê û duhiyê di evroyê da didomîne. Bexda di salên notan da û rewşa xelkê wê û kurdên wê di bin desthilata Sedamî û di bin embargoya Emerîkayê da û gelek wêne û pirsên ji wan çêdibin di vê pirtûka qerase da berçav dibin.

Gare kurê Ezoyê Siyarî li gel jina xwe Zeynebê li Bexdayê dijîn û ew, piştî gelek derd û zehmetiyan û jidestdana çend zarokan, dibin xudan çar zarok, du keç û du kur, lê zarokê dûmahiyê ku navê wî Xanedan e şaşiyek di tora çavên wî da ye û li gor doktoran eger ew nehên çareser kirin, dê ew bi yekcarî hutim bin. Pêşniyaz jî ew e ku wî ji bo neştergeriyê bibin derve.

Hevalekê Gareyî bi  navê Sade li Emerîkayê, ku bi xwe xelkê Tilkêfê ye lê dibe xudan û bi alîkariya rêxistineka qencîxwaz ya bi navê Hêlînk û bi rêya Urdunê, Xanedanê sava bi tenê ji bo çareserkirina çavên wî, bê dayik û bab dibin Emerîkayê û piştî çend mehan û çend neştergeriyan çavên kurkî çêdibin û vedigere Bexda bo nav malbata xwe.

Gare bi xwe rojnamevan e û rêberê beşekî ye li fermanberiyeka dewletê û ew sih sali in ew li wê derê kar dike. Herweha li wê fermanberiyê jineka kurd bi navê Viyan kar dike, ku mêrê wê di şerê Îraq û Îranê da wenda dibe û di navbera wê jinê û Gareyî da dostînî û evîneka mukim peyda dibe û siha wê peywendiyê xwe berdide ser malbat û jiyana Gareyî jî.

Gelek bûyer û çîrok û serhatî û babet her ji demê bûna Xanedanî û heta çûna wî bo derve û vegera wî tên behiskirin û em Gare yê bawermend û ji xap, direw û siyasetê dûr, Gareyê evîndar di tengaviyên nefsî, aborî û malbatî da bihêz dibînin û dibin bînerên berxwedana wî di fermanberiyê da li hember raportçî û derdora gendel û çawa ew bi derxistina wî ji karî bi dawî tê, lê zarokê wî bi çavên rohin vedigere nav hembêzên wî û malbata wî.

 

 

ناڤێ کتێبێ: وارێ رۆندکا

نڤیسکار: محەمەد سەلیم سواری

وەشانخانە: ملتقی الاهالی الثقافی العراقی

سالا وەشانێ: ٢٠١٠

هەژمارا رووپەلان: ٤٤٦

 ئه‌ڤ رۆمان مه‌ دبه‌ ناڤ ده‌م و جهێن جودا ل باشوورێ کوردستانێ، ل به‌غدا، ل ئوردون و ئه‌مه‌ریکایێ و دوهیێ د ئه‌ڤرۆیێ دا ددۆمینه‌. به‌غدا د سالێن نۆتان دا و ره‌وشا خه‌لکێ وێ و کوردێن وێ د بن ده‌ستهلاتا سه‌دامی و د بن ئه‌مبارگۆیا ئه‌مه‌ریکایێ دا و گه‌له‌ک وێنه‌ و پرسێن ژ وان چێدبن د ڤێ پرتووکا قه‌راسه‌ دا به‌رچاڤ دبن

گاره‌ کورێ عه‌زۆیێ سیاری ل گه‌ل ژنا خوه‌ زه‌ینه‌بێ ل به‌غدایێ دژین و ئه‌و، پشتی گه‌له‌ک ده‌رد و زه‌حمه‌تیان و ژده‌ستدانا چەند زارۆکان، دبن خودان چار زارۆک، دو که‌چ و دو کور، لێ زارۆکێ دووماهیێ کو ناڤێ وی خانه‌دانە، شاشیه‌ک د تۆرا چاڤێن وی دا یه‌ و ل گۆر دۆکتۆران ئه‌گه‌ر ئه‌و نه‌هێن چاره‌سه‌ر کرن، دێ ئه‌و ب یه‌کجاری حوتم بن. پێشنیاز ژی ئه‌وە کو وی ژ بۆ نه‌شته‌رگەریێ ببن ده‌رڤه.‌

هه‌ڤاله‌کێ گاره‌یی ب  ناڤێ ساده‌ ل ئه‌مه‌ریکایێ، کو ب خوه‌ خه‌لکێ تلکێفێ یه‌ لێ دبه‌ خودان و ب ئالیکاریا رێخستنه‌کا قه‌نجیخواز یا ب ناڤێ هێلینک و ب رێیا ئوردونێ، خانه‌دانێ ساڤا ب ته‌نێ ژ بۆ چاره‌سه‌رکرنا چاڤێن وی، بێ دایک و باب دبن ئه‌مه‌ریکایێ و پشتی چه‌ند مه‌هان و چه‌ند نه‌شته‌رگه‌رییان چاڤێن کورکی چێدبن و ڤه‌دگه‌ره‌ به‌غدا بۆ ناڤ مالباتا خوه.‌

گاره‌ ب خوه‌ رۆژنامه‌ڤانە‌ و رێبه‌رێ به‌شه‌کی یه‌ ل فه‌رمانبه‌ریه‌کا دەولەتێ و ئه‌و سهـ سالن ئه‌و ل وێ ده‌رێ کار دکه‌. هه‌روه‌ها ل وێ فه‌رمانبه‌ریێ ژنه‌کا کورد ب ناڤێ ڤیان کار دکه‌، کو مێرێ وێ د شه‌رێ عیراق و ئیرانێ دا وه‌ندا دبه‌ و د ناڤبه‌را وێ ژنێ و گاره‌یی دا دۆستینی و ئه‌ڤینه‌کا موکم په‌یدا دبه‌ و سها وێ پەیوەندیێ خوه‌ به‌ردده‌ سه‌ر مالبات و ژیانا گاره‌یی ژی.

گه‌له‌ک بوویه‌ر و چیرۆک و سه‌رهاتی و بابه‌ت هه‌ر ژ ده‌مێ بوونا خانه‌دانی و هه‌تا چوونا وی بۆ ده‌رڤه‌ و ڤه‌گه‌را وی تێن به‌حسکرن و ئه‌م گاره‌ یێ باوه‌رمه‌ند و ژ خاپ، دره‌و و سیاسه‌تێ دوور، گاره‌یێ ئه‌ڤیندار د ته‌نگاڤیێن نه‌فسی، ئابۆری و مالباتی دا بهێز دبینن و دبن بینه‌رێن به‌رخوه‌دانا وی د فه‌رمانبه‌ریێ دا ل هه‌مبه‌ر راپۆرتچی و ده‌ردۆرا گه‌نده‌ل و چاوا ئەو ب ده‌رخستنا وی ژ کاری ب داوی تێ، لێ زارۆکێ وی ب چاڤێن رۆهن ڤه‌دگه‌ره‌ ناڤ هه‌مبێزێن وی و مالباتا وی.