Namya / Rojanêt cehinemiyekî

Navê kitêbê: Namya / Rojanêt cehinemiyekî

Nivîskar: Şihwan Dasinî

Weşanxane: Çapxaneya Hawar li Dihokê

Sala weşanê: 2018

Hejmara rûpelan: 227

Namya yan Rojanêt cehinemiyekî me di navbera xeyal û rastiyê da digêrîne û qala mirovan û kartêkirina eqil û reftarên wan li ser çarenivîsa wan bi xwe û dorhêla wan dike.

Namya û Wenhaş du caran û di du kirasên cuda da jiyane û hez ji yekûdu kiriye, lê ji ber derdorê nikaribûn xweşiyê pê bibin û bigehin hev. Cara duyê wekî balinde; Namya wekî kotir û Wenhaş wekî belatînk jiyan. Wê carê jî hez ji hevûdud dikin, lê li ser destên du kesan dimirin, ku ew kes paşî di jiyana sêyê de dibin babên wan.

Namya diçe beheştê û Wenhaş cehenemê û li wê derê û li bin çavdêriya xudêyê giyaneweran û berpirsê cehenemê Wenhaş dihê dadgeh kirin. Di encamê da kurê cehenemê Wenhaş û keça beheştê Namya, yên ku li wê derê jî ji hev veqetandî bûn, mafê jiyaneka nû, ya sêyem, wekî mirov distînin û li welatê Cudabûnê peyda dibin.

Namya dibe keça Êrênî, mezinê miletê heyvê û wenhaş kurê Rojoyî, mezinê miletê rojê. Babên herduyan dethilatdarên xerab in û zordariyê li xelkê xwe dikin û di şerî da ne, li dijî yekûdu. Wextê Namya û Wenhaş dibin hejde salî ew li cihekî yekûdu dibînin û yekûdu ji jiyana berî wê nas dikin û evîna wan dîsan sax dibe. Lê rojekê û di demê şerê di navbera leşkerên herdu baban da, Êrên dizane ku keça wî Namya û kurê dijminê wî Rojoyî dê li cihekî hevûdu bînin. Ew bi leşkerê xwe ve diçe ser wan û bi du tîran û li ber çavê xelkê xwe herduyan dikuje.

Di vê kitêbê da gelek çîrok hene, yek ji wan ya welatê Cudabûnê. Ka çawa miletekê nezan li wê derê roj diperist û Rojoyê diz û hîletok xwe li serê wan kir desthilatdarê miletê rojê. Ew kesên ji desthilata wî revîbûn li şûna rojê heyv perist û Êrênê nebaş û kujek bû serokê miletê heyvê. Weha welatê Cudabûnê bû du welat û herdu li dijî yek.

Gelek babet di vê berhemê da hatine livandin, mîna ka nezanîn û paşveman çi diîne serê mirov û miletan. Herweha pirsa jinê û bihayê wê wekî mirov di civaka mêran da, krasguhorîn, hezên mirovan û yariya xudayî û hêj ku di vê romanê de berçav dibin.

 

ناڤێ کتێبێ: نامیا / رۆژانێت جەهنەمیەکی

نڤیسکار: شهوان داسنی

وەشانخانە: چاپخانەیا هاوار ل دهۆکێ

سالا وەشانێ: ٢٠١٨

هەژمارا رووپەلان: ٢٢٧

 

نامیا یان ڕۆژانێت جه‌هنه‌میه‌کی مه‌ د ناڤبه‌را خه‌یال و ڕاستیێ دا دگێرینه‌ و قالا مرۆڤان و کاڕتێکرنا عەقل و ڕه‌فتارێن وان ل سه‌ر چاره‌نڤیسا وان ب خوه‌ و دۆرهێلا وان دکه.‌

نامیا و وه‌نهاش دو جاران و د دو کراسێن جودا دا ژیانه‌ و حه‌ز ژ یه‌کودو کریه‌، لێ ژ به‌ڕ ده‌ردۆڕێ نکاربوون خوه‌شیێ پێ ببن و بگه‌هن هه‌ڤ. جاڕا دویێ وه‌کی بالنده‌؛ نامیا وه‌کی کۆتر و وه‌نهاش وه‌کی به‌لاتینک ژیان. وێ جاڕێ ژی حه‌ز ژ هه‌ڤوودود دکن، لێ ل سه‌ر ده‌ستێن دو که‌سان دمرن، کو ئه‌و کەس پاشی د ژیانا سێیێ دا دبن بابێن وان.

نامیا دچه‌ به‌هه‌شتێ و وه‌نهاش جه‌هه‌نه‌مێ و ل وێ ده‌رێ و ل بن چاڤدێڕیا خودێیێ گیانه‌وه‌ران و به‌رپرسێ جه‌هه‌نه‌مێ وه‌نهاش دهێ دادگه‌هـ کرن. د ئه‌نجامێ دا‌ کورێ جه‌هه‌نه‌مێ وه‌نهاش و که‌چا به‌هه‌شتێ نامیا، یێن کو ل وێ ده‌رێ ژی ژ هه‌ڤ ڤه‌قه‌تاندی بوون، مافێ ژیانه‌کا نوو، یا سێیه‌م، وه‌کی مرۆڤ دستینن و ل وه‌لاتێ جودابوونێ په‌یدا دبن.

نامیا دبه‌ که‌چا ئێرێنی، مه‌زنێ مله‌تێ هه‌یڤێ و وه‌نهاش کوڕێ ڕۆژۆیی، مه‌زنێ مله‌تێ ڕۆژێ. بابێن هه‌ردویان دەستهلاتدارێن خه‌رابن و زۆرداریێ ل خه‌لکێ خوه‌ دکن و د شه‌ڕی دا‌ نه‌, ل دژی یه‌کودو. وه‌ختێ نامیا و وه‌نهاش دبن هه‌ژده‌ سالی ئه‌و ل جهه‌کی یه‌کودو دبینن و یه‌کودو ژ ژیانا به‌ری وێ ناس دکن و ئه‌ڤینا وان دیسان ساخ دبه‌. لێ ڕۆژه‌کێ و د ده‌مێ شه‌رێ د ناڤبه‌را له‌شکه‌رێن هه‌ردو بابان دا، ئێرێن دزانه‌ کو که‌چا وی نامیا و کورێ دژمنێ وی ڕۆژۆیی دێ ل جهه‌کی هه‌ڤودو بینن. ئه‌و ب له‌شکه‌رێ خوه‌ ڤه‌ دچه‌ سه‌ر وان و ب دو تیران و ل به‌ر چاڤێ خه‌لکێ خوه‌ هه‌ردویان دکوژه.‌

د ڤێ کتێبێ دا گه‌له‌ک چیرۆک هه‌نه‌، یه‌ک ژ وان یا وه‌لاتێ جودابوونێ. کا چاوا مله‌ته‌کێ نه‌زان ل وێ ده‌رێ ڕۆژ دپه‌رست و ڕۆژۆیێ دز و حیله‌تۆک خوه‌ ل سه‌رێ وان کر ده‌ستهلاتدارێ مله‌تێ ڕۆژێ. ئه‌و که‌سێن ژ ده‌ستهلاتا وی ڕه‌ڤیبوون ل شوونا رۆژێ هه‌یڤ په‌رست و ئێرینێ نه‌باش و کوژه‌ک بوو سه‌رۆکێ مله‌تێ هه‌یڤێ. وه‌ها وه‌لاتێ جودابوونێ بوو دو وه‌لات و هەردو ل دژی یه‌ک.

گه‌له‌ک بابه‌ت د ڤێ به‌رهه‌مێ دا‌ هاتنه‌ لڤاندن، مینا کا نه‌زانین و پاشڤه‌مان چ دئینه‌ سه‌رێ مرۆڤ و ملەتان. هه‌روه‌ها پرسا ژنێ و بهایێ وێ وه‌کی مرۆڤ د جڤاکا مێران دا، کراسگوهۆرین، حه‌زێن مرۆڤان و یاریا خودایی و هێژ یێن کو د ڤێ ڕۆمانێ دا به‌رچاڤ دبن.