Sîfra Silîvî / Lêgeriyanek li qetê dî

 Navê kitêbê: Sîfra Silîvî / Lêgeriyanek li qetê dî

Nivîskar: Sebrî Silêvaneyî

Weşanxane: Çapxaneya Hawar li Dihokê

Sala weşanê: 2009

Hejmara rûpelan: 147

Sîfra Silîvî romanek e li ser hevalîniya qayim ya du kesan û dorhêla wan. Ew xwendevanî dadihêle bo nav gotûbêjan derbareyê gelek pirsên hizrî yên girêdayî mirovbûnê yên mîna bûn, azadî, întîma û xudê û di van û gelekên din da geriyaneka berdewam heye li dû pirsiyaran û qedên xwe yên dî û xwebûnê.

Sermed û Hişyar Silîvî ji Sêmêlê ne û her ji zarokîniyê heval in. Ew herdu pêk ve hersê astên xwendinê; yên destpêkê, navincî û peymangeha berhevkirina mamosteyan dixwînin. Piştî xwendinê Sermed jinê diîne, lê ne Hişyar.

Sala 1988ê bajêrê Sêmêlê dihê qesifkirin û malbatek ber dikeve, jin û zelam dihên kuştin û zarokê wan yê du salî jê rizgar dibe. Hişyar li wî zarokê ku navê wî Mihemed e dibe xudan û jê ra dibe bab. Sala 1993yê Hişyar diçe Ewrûpayê û Mihemedî li Sêmêlê dihêle. Ji wê derê alîkarîya kurê xwe Mihemedî dike. Mihemed xwendina xwe ya andazyarîyê timam dike. Hişyar piştî 14 salan li xerîbîyê vedigere welatê xwe bi yekcarî û nêzîktirîn dostê wî her Sermed e. Lê tenduristîya Hişyarî têk diçe û dimire.

Sermed serhatîyên xwe li gel Hişyarî, li her sê astên xwendinê, li Sêmêl, Dihok û Mûsilê bi gelek hûrgiliyên balkêş ve dibêje. Qala rewşa civakî, siyasî, fikrî ya salên heştêyan heta salên destpêka sedsala bîstûyekê dike. Ev berhem ji bilî vegêrana serhatî û bûyerên balkêş ew herweha dagirtiye bi gengeşeyên hizrî, felsefî, lahûtî û arêşeyên snêleyan.

Ji rûpelê 101: ” Rwînişitn li ser erdî xweş e ji ber ku mirov nêzîkî axê dibit, azad dibit û hest bi zat û resenê xwe dikit. Belê rwîniştin li ser kursîkan mirovî girê didit, bigire ji kursîka helaqî heta ya serokî”

 

 

 

ناڤێ کتێبێ: سیفرا سلیڤی / لێگەریانەک ل قەتێ دی

نڤیسکار:سەبری سلێڤانەیی

وەشانخانە: چاپخانەیا هاوار ل دهۆکێ

سالا وەشانێ: ٢٠٠٩

هەژمارا رووپەلان: ١٤٧

سیفرا سلیڤی ڕۆمانه‌که‌ ل سه‌ر هه‌ڤالینیا قایم یا دو که‌سان و دۆرهێلا وان. ئه‌و خوه‌نده‌ڤانی دادهێله‌ بۆ ناڤ گۆتووبێژان ده‌رباره‌یێ گه‌له‌ک پرسێن هزری یێن گرێدایی مرۆڤبوونێ یێن مینا بوون، ئازادی، ئینتیما و خودێ و د ڤان و گه‌له‌کێن دن د گه‌ریانه‌کا به‌رده‌وام هه‌یه‌ ل دوو پرسیاران و قه‌دێن خوه‌ یێن دی و خوه‌بوونێ.

سه‌رمه‌د و هشیار سلیڤی ژ سێمێلێ نه‌ و هه‌ر ژ زارۆکینیێ هه‌ڤالن. ئه‌و هه‌ردو پێک ڤه‌ هه‌رسێ ئاستێن خوه‌ندنێ؛ یێن ده‌ستپێکێ، ناڤنجی و په‌یمانگه‌ها به‌رهه‌ڤکرنا مامۆسته‌یان دخوینن. پشتی خوه‌ندنێ سه‌رمه‌د ژنێ دئینه‌، لێ نه‌ هشیار.

سالا ۱۹۸۸ێ باژێرێ سێمێلێ دهێ قه‌سفکرن و مالباته‌ک به‌ر دکه‌ڤه‌، ژن و زه‌لام دهێن کوشتن و زارۆکێ وان یێ دو سالی ژێ ڕزگار دبه‌. هشیار ل وی زارۆکێ کو ناڤێ وی محه‌مه‌ده‌ دبه‌ خودان و ژێ ڕا دبه‌ باب. سالا ۱۹۹۳ێ هشیار دچه‌ ئه‌وروپایێ و محه‌مه‌دی ل سێمێلێ دهێله‌. ژ وێ ده‌رێ ئالیکاریا کورێ خوه‌ محه‌مه‌دی دکه‌. محه‌مه‌د خوه‌ندنا خوه‌ یا ئەندازیارییێ تمام دکه‌. هشیار پشتی ۱٤ سالان ل خه‌ریبییێ ڤه‌دگه‌ره‌ وه‌لاتێ خوه‌ ب یه‌کجاری و نێزیکترین دۆستێ ویبەردەوام سەرمەدە. لێ ته‌ندورستییا هشیاری تێک دچه‌ و دمره.‌

سه‌رمه‌د سه‌رهاتییێن خوه‌ ل گه‌ل هشیاری، ل هه‌ر سێ ئاستێن خوه‌ندنێ، ل سێمێل، دهۆک و مووسلێ ب گه‌له‌ک هوورگلیێن بالکێش ڤه‌ دبێژه‌. قالا ڕه‌وشا جڤاکی، سیاسی، فکری یا سالێن هه‌شتێیان هه‌تا سالێن ده‌ستپێکا سه‌دسالا بیستوویه‌کێ دکه‌. ئه‌ڤ به‌رهه‌م ژ بلی ڤه‌گێرانا سەرهاتی و بوویه‌رێن بالکێش ئەو هەروەها داگرتیه‌ ب گه‌نگه‌شه‌یێن هزری، فه‌لسه‌فی، لاهووتی و ئارێشه‌یێن سنێله‌یان.

ژ رووپەلێ ١٠١: "روینشتن ل سەر ئەردی خوەشە ژ بەر کو مرۆڤ نێزیکی ئاخێ دبت، ئازاد دبت و هەست ب زات و رەسەنێ خوە دکت. بەلێ روینشتن ل سەر کورسیکان مرۆڤی گرێ ددت، بگرە ژ کورسیکا حەلاقی هەتا یا سەرۆکی"