Hîzar di werçerxana da(1)

Navê kitêbê: Hîzar di werçerxana da(1)

Nivîskar: Sindis Nihêlî

Weşanxane: Çapxaneya Xanî

Sala weşanê: 2013

Hejmara rûpelan: 274

Ev yekemîn roman e ku jinek li başûrê Kurdistanê bi kurdiya kurmancî û bi herfên erebî dinivîse. Mijarên serekî yên wê trajediya miletê kurd e, dagîrkeriya Kurdistanê û mafê serxwebûna wê ye û herweha nakokiyên di nav hêzên serekî yên kurdan da û gendelî ya zal di nav desthilatê da.

Hîzar ji bo xwandina Doktorayê diçe Amerîkayê û têza xwe li ser dewletbûna Kurdistanê pêşkêş dike. Herçend ew gelek ji welatê xwe dûr e lê bîrgeha wê ew qas ji wê, ya li welatê xwe dîtî pir e, ku nikare di her tiştî û gotina di hawîrdora xwe da, wê hemî neheqî û derdeseriyê yên bi serê xelk û welatê wê da hatine nebîne.

Weha xwendevan li gele Hïzarê û vegêranên wê paşda digerin bo demê ew li lîseyê û xebata wê ya birînpêçiyê di nav pêşmergeyan da, hatina enfalan, girtina wê û ew hemî hovîtî û azarên wê û yên pê ra, ji jin û keçan li ser destên reşekên Seddamî dîtine, serhildan, reva milyonî, veger û hilbijartin û çêbûna hikûmeta kurdî heta şerê birakujiyê û gendelî ya di desthilatê da belavbûyî.

Xwendevan di vê romanê da zêdebarî naskirina bûyerên dîrokî û xembar yên Kurdistanê, gelek çîrok û serhatiyên kesên vê kitêbê nas dike; wekî serhatiya Hïzarê û ya bi serê wê û malbata wê hatî û çîroka mêrê wê Akoyî, herweha ya bi serê Mela Baqî di demê serhildanê da hatî û çîroka Şevînê û nihêniya mêrê wê û gelekên din, jibilî azirandina gelek pirsiyaran derbareyê rewşa niha ya Kurdistanê û siberoja wê.

Ji rûpela 42: ”Qeda bi hewe bikevin zelam, erê hizar qeda, hwîn hemî êxsîrên leşê jinê ne.”

 

ناڤێ کتێبێ: هیزار د وه‌رچه‌رخانا دا (١)

نڤیسکار: سندس نهێلی

وه‌شانخانه‌: چاپخانه‌یا خانی

سالا وه‌شانێ: ۲۰۱۳

هه‌ژمارا رووپه‌لان: ۲۷٤

ئه‌ڤ یه‌که‌مین رۆمانە‌ کو ژنه‌ک ل باشوورێ کوردستانێ ب کوردیا کورمانجی و ب حه‌رفێن عه‌ره‌بی دنڤیسه‌. مژارێن سه‌ره‌کی یێن وێ تراژەدیا مله‌تێ کوردە، داگیرکه‌ریا کوردستانێ و مافێ سه‌رخوه‌بوونا وێ یه‌ و هه‌روه‌ها ناکۆکیێن د ناڤ هێزێن سه‌ره‌کی یێن کوردان دا و گه‌نده‌لی یا زال د ناڤ ده‌ستهلاتێ دا.

هیزار ژ بۆ خواندنا دۆکتۆرایێ دچه‌ ئەمه‌ریکایێ و تێزا خوه‌ ل سه‌ر ده‌وله‌تبوونا کوردستانێ پێشکێش دکه‌. هه‌رچه‌ند ئه‌و گه‌له‌ک ژ وه‌لاتێ خوه‌ دوورە،‌ لێ بیرگه‌ها وێ ئه‌و قاس ژ وێ، یا ل وه‌لاتێ خوه‌ دیتی پڕە، کو نکاره‌ د هه‌ر تشتی و گۆتنا د هاویردۆرا خوه‌ دا، وێ هه‌می نه‌حه‌قی و ده‌رده‌سه‌ریێ، یێن ب سه‌رێ خه‌لک و وه‌لاتێ وێ دا ها‌تنه‌ نه‌بینه.‌

خوەندەڤان ل گەل هیزارێ و ڤه‌گێرانێن وێ پاشدا دگه‌رن بۆ ده‌مێ ئه‌و ل لیسه‌یێ و خه‌باتا وێ یا برینپێچیێ د ناڤ پێشمه‌رگه‌یان دا، هاتنا ئه‌نفالان، گرتنا وێ و ئه‌و هه‌می هۆڤیتی و ئازارێن وێ و یێن پێ ڕا، ژ ژن و که‌چان ل سه‌ر ده‌ستێن ڕه‌شه‌کێن سه‌ددامی دیتنه‌، سه‌رهلدان، ڕه‌ڤا ملیۆنی، زڤرین و هلبژارتن و چێبوونا حکوومه‌تا کوردی و هه‌تا شه‌رێ براکوژیێ و گه‌نده‌لی یا د ده‌ستهلاتێ دا به‌لاڤبوویی.

خوه‌نده‌ڤان د ڤێ ڕۆمانێ دا زێده‌باری ناسکرنا بوویه‌رێن دیرۆکی و خه‌مبار یێن کوردستانێ، گه‌له‌ک چیرۆک و سه‌رهاتیێن که‌سێن ڤێ کتێبێ ناس دکە؛ وه‌کی سه‌رهاتیا هیزارێ و یا ب سه‌رێ وێ و مالباتا وێ هاتی و چیرۆکا مێرێ وێ ئاکۆیی، هه‌روه‌ها یا ب سەرێ مه‌لا باقی د ده‌مێ سه‌رهلدانێ دا هاتی و چیرۆکا شه‌ڤینێ و نهێنیا مێرێ وێ و گه‌له‌کێن دن، ژ بلی ئازراندنا گەلەک پرسیاران دەربارەیێ رەوشا نها یا کوردستانێ و سبەرۆژا وێ.

ژ رووپەرێ ٤٢: "قەدا ب هەوە بکەڤن، ئەرێ قەدا، هوین هەمی ئێخسیرێن لەشێ ژنێ نە".