Çavê sîtavkê

Navê kitêbê: Çavê sîtavkê
Nivîskar: Tehsîn Navişkî ( Tehsin Navishki )
Weşanxane: Êketiya nivîserên kurd – tayê Dihokê
Sala weşanê: 2007
Hejmara rûpelan: 441

 Herçend e mijara serekî ya romana Çavê sîtavkê gendelî, bêqanûnî û bêbihabûna mirovî ye di civakê û sîstema îdarî da û di wî warî da pirî rexne ye, lê ew herweha jî qodîkek e, mirov tê da bi zelalî civakekê bi kesên wê, sexlet, reftar, hest, adet û jiyana wê ya rojane nas dike.

Izêr pîremêr e û piştî mirina jinê û cudabûna herçar zarokên wî, ew bi tenê di xaniyê xwe yê li bajêrî da dijî û wî herweha erdê xwe li gundî jî heye, lê li gel vê jî ew çavê xwe nade xwarin û siheta xwe û ne alîkariya zarokên xwe dike û ne jî xwe hewceyî wan dike. Ew li mala xwe tizbiyan çêdike û li sûka navbajêrî, li ser cehdeyan rûdine û wan difiroş. Lê polîsek bi navê Sîpanî yê ku ji nişkekê ve û bê diploma pêdivî bûye efser rê nade kesek bê bertîldan li wê derê tiştên xwe bifiroşe. Izêr naxwaze pênc dînara wekî bertîl bideyê û efser jî bela xwe jê venake û ji wê teftara wî dixeyide û lê dixe, bi merema wî bitirsîne da ku ew jî, wekî hemiyan pareyê xwe yê bertîlê bide, lê Izêr ji rikmana xwe nayê xwarê, bertîlê nade û li wê derê li ser pêyan tizbiyên xwe difiroşe.

Rojekê efendiyek tizbiyekê ji Izêrî dikire û sed dolaran ku ji bihayê tizbiyê gelek bêtir bû dideyê. Izêr jî bi keyf diçe cem bikirekê dolaran ji bo ku wî sedî bike dînar. Serraf jî pê dihese ku ew dolar sexte ye û ew polîsan pê agahdar dike û Izêrî li wê derê mijûl dike heta efserê polîsan Sîpan dihê. Sîpan jî wê bi derfetek baş dibîne ji bo ku wî pîremêrî biêşîne û rezîl bike da ku êdî kes serê xwe li ber wî raneke. Evca efser wî bi tuhmeta kirîn û firotina dolarê sexte digire û Izêrê pîr yê haya wî ji dolarê sexte nîne li ser destê Sîpanî dihê êşandin û çi guh ji bo gotina wî çênabin û ew di girtîgehê da dimire.

Bi mirina Izêrî rewşa Sîpanê efser xerba dibe, Izêr li ber wî dibe helametek û li her derê pê ra dibe û tîne bîra wî ku ew bûye egera mirina wî. Weha li Sîpanê dihê ku ew êdî li gel helametê Izêrî diaxive û rewşa wî ya derûnî tevlihev dibe û ji karê xwe dûr dikeve û ew hemî jî kar dike ser jina wî û hemî jiyana wan ya pêkve.

Ji bilî wê û piştî mirina Izêrî xwendevan herwesa li ser rewşa herdu kur û herdu keçên wî û pirsgirêka milkî û ya dihê serê wan û malbatên wan haydar dibin û gelek çîrokên din jî vê romanê dixemilînin.

2020.05.1